| |
|||
| prosody | miscellaneous |
Bon'aventura don Dieus als Pizas, Quar son ardit e d'armas ben apres, E an baissat l'erguelh dels Genoes, Que.ls fan estar aunitz e soteiras: Per qu'ieu volrai tostemps l'onor de Piza, Quar an baissatz los perfietz ergulhos! Que sol l'enueis dels vilas borbonos Me trenca.l cor e.l me franh e.l me briza. Alamans trop descauzitz e vilas, E quan negus si fenh d'esser cortes, Ira mortals cozens et enueitz es: E lor parlars sembla lairar de cas! Per qu'ieu no vuelh esser senher de Friza, Qu'auzis soven lo glat dels enuios: Ans vuelh estar entre.ls Lombartz joyos, Pres de midons, qu'es blanqu'e gras'e liza. E pus mieus es Monferratz e Milas, A mon dan giet Alamans e Ties! E si.m creira Richartz, reis dels Engles, Em breu d'ora tornara per sas mas Lo regisme de Palerm'e de Riza, Quar lo conquis la soa rezemsos. De mi dic ben: si pel Marques no fos, No pretz cinc marcs una rota camiza. Ara m'alberc Dieus e Sains Julias E la doussa terra de Canaves! Qu'en Proensa no tornarai ieu ges, Pus sai m'acuelh Laneris et Aillans. E s'aver puesc selha qu'ai tant enquiza, De lai s'estei lo valens reis N'Amfos, Qu'ieu farai sai mos vers e mas chansos Per la gensor qu'anc fos d'amor enquiza. E pus Milas es autz e sobeiras, Ben volgra patz de lor e dels Paves, E que estes Lombardi'en defes De crois ribautz e de mals escaras. Lombartz, membre.us cum Polla fo conquiza, De las dompnas e dels valens baros, Cum las mes hom en poder de garsos: E de vos lai faran peior deviza. E N'Alacais, tant vos ai ades quiza, Qu'ar l'uns en ten l'autre per enoios! Eu remandrai tant quan er fait lo dos, Quar genser es qu'anc fos d'amor enquiza. |