Main PageTroubadours' ListingMore Works by Peire Vidal

The prosody guide is available as a book. Click here for details.

Per ses dei una chanso
Al cortes rei d'Arago,
Qu'estiers non canter'ongan
Per l'enuei e per l'enjan
Que.m fetz silh cui Dieus abais!
E s'anc fui per s'amor gais,
Ar la guerpisc e la lais,
E mais no for'amoros,
Dur cor, si per vos no fos.

E ja Dieus noca.m perdo,
S'anc tan bella dona fo
Ni de tan cortes semblan,
Ni anc hom tan gen parlan
No vi ni o fara mais!
Que quant us motz l'ieis del cais
Et ieu l'aug, si.m sui licais,
Qu'en cre morir talentos,
S'al meins non l'en aug dir dos.

E quar en aital sazo
Me fetz secors bell e bo,
Vos en ren merces chantan:
Qu'estiers non pogra l'afan
Sufrir ni.l plor ni.l pantais,
Quant elha s'amor m'estrais,
Si no fos uns cortes jais,
Que.m ve, dona, de ves vos,
Per qu'ieu m'en viu deleitos.

E per aquesta razo
Conosc be que vostr'om so,
E vuelh estar derenan
Del tot al vostre coman.
E metrai me en totz fais
De dir e de far que.us plais,
Cum vostre rics pretz verais
An s'enans totas sazos
Entre.ls drutz galhartz e bos.