Main PageTroubadours' ListingMore Works by Peire Vidal

The prosody guide is available as a book. Click here for details.

Drogoman senher, s'ieu agues bon destrier,
En fol plag foran intrat tuich mei guerrier:
Qu'aqui mezeis quant hom lor mi mentau
Mi temon plus que cailla esparvier,
E no prezon lur vida un denier,
Tan mi sabon fer e salvatg'e brau.

Quant ai vestit mon fort ausberc doblier
E seint lo bran que.m det En Gui l'autrier,
La terra crolla per aqui on ieu vau!
E non ai enemic tan sobrancier
Que tost no.m lais las vias e.l sentier,
Tan mi dupton quan senton mon esclau.

D'ardimen vaill Rotlan et Olivier
E de domnei Berart de Mondesdier!
Car soi tan pros, per aquo n'ai bon lau,
Que sovendet m'en venon messatgier
Ab anels d'aur, ab cordon blanc e nier,
Ab tals salutz don totz mos cors s'esjau.

En totas res sembli ben cavallier!
Si.m sui, e sai d'amor tot son mestier
E tot aisso qu'a drudairi'abau!
Anc en cambra non ac tan plazentier
Ni ab armas tan mal ni tan sobrier,
Don m'am'e.m tem tals que no.m ve ni m'au.

E s'ieu agues caval adreg corsier,
Suau s'estes lo reis part Balaguier
E dormis si planamen e suau!
Que.il tengr'en patz Proens'e Monpeslier,
Que raubador ni malvatz rocinier
No rauberon ni Autaves ni Crau.

E si.l reis torn'a Tholos'el gravier,
E n'eis lo coms e siei caitiu dardier,
Que tot jorn cridon: Aspa et Orsau,
De tan mi van qu'ieu n'aurai.l colp premier,
E ferrai tan que n'intraran doblier,
Et ieu ab lor, qui la porta no.m clau.

E s'ieu cossec gilos ni lauzengier
Qu'ap fals cosselh gastan l'autrui sabrier
E baisson joi a presen et a frau,
Per ver sabra qual son li colp qu'ieu fier:
Que s'avia cors de fer o d'acier
No lur valra una pluma de pau.

Na Vierna, merce de Monpeslier
En raina sai amaretz cavallier!
Don jois m'es mais cregutz per vos, Dieu lau.