Main PageTroubadours' ListingMore Works by Peire Vidal

The prosody guide is available as a book. Click here for details.

Pus ubert ai mon ric thesaur,
Trairai.n un gai sonet novell,
Que trametrai part Mongibell
Al pro marques de Sardenha,
Qu'ab joi viu et ab sen renha:
Gen sap donar e retener
E creis s'onor e son poder.
E mos cars filhs, lo coms Enrics,
A destruitz totz sos enemics
Et als sieus es tan ferms abrics,
Que qui.s vol ven e qui.s vol vai
Meins de duptansa e d'esmai.

No vuelh sobras d'argent ni d'aur,
Tant ai lo cor gai et isnell!
E quant truep tornei ni sembell,
Voluntiers desplec m'ensenha
E jong e fatz d'asta lenha.
E quant truep alcun que m'esper,
Mort o viu l'aven a cazer!
Qu'ab armas sui un pauc enics
E non crei cosselh ni castics,
Ni m'azaut de trop loncs prezics.
Aissi.m viu et aissi m'estai
Et am tal domna cum ieu sai.

Per sieu tenh Vertfuelh e Monlaur
E servo.lh plus de cent castell
E tres ciutatz ses tot revell!
Et a cor que pretz mantenha
E qu'ab cortezia.s tenha,
Que s'om honratz la ven vezer,
Tan li fai e.l ditz de plazer,
Qu'al partir s'en vai sos amics.
Et anc no.l plac enjans ni trics,
Ni lauzengiers ni gelos brics,
Ans lor fai dir: estatz vos lai,
Que ren no avetz a far sai.

Color fresc'a ab cabelh saur
Et anc non obret de pinzell,
Mas Mongalhart e Daurabell
Li platz qu'a sos ops retenha.
Beljoc no vent ni empenha,
E mi fai Montamat tener
E Bon-repaus per miels jazer!
E per m'amor platz l'Ostals-rics
Et es sieus Esquiva-mendics!
Et al marques non es destrics,
Si.m dona Segur e Clavai
Et a liei Cardon'e Monjai.

De Fois vuelh Laroqu'e Lavaur
E.l bell palaitz e.l dous pradell
E.l vergier on chanton l'auzell
E Ben-aic e Melhs-m'en-venha!
E si la comtessa.m denha,
Seguramen puesc remaner,
Quar complit seran mei voler.
Qu'ieu no vuelh esser Lodoics
Ni Manuels ni Frederics
Ni de Narbona N'Aimerics:
Quar qui a so que plus li plai,
De tot lo mon a.l miels e.l mai.

E Lanz'aguda tegna.l Maur,
Ab Dur-os et ab Negra-pell,
E Trencan-nut e Mal-coutell
E Crebacor e Compenha
E Roignas ab que s'estrenha.
Mal-matin conques e Mal-ser,
Quan det trega per pauc d'aver.
Sieus es Villans e Montantics,
Malas-meissos e Viels-espics,
E Cava-dens e pueis Lombrics,
E Cordolors e Fastic-fai
E Malamortz e Vida.l-trai.

Liatz a la coa d'un taur
Degr'esser frustatz al mazell
D'Ast on vesti l'orre capell
De tracion, on s'enprenha
L'ereges fals, qui no.s senha!
Quar hom pieitz no.s pot dechazer
Ni degeitz non pot meins valer.
Que.l Marques cui es Salanics
Li dis: per que morir no.t gics
Et es assatz plus secs que pics,
E non pretz tot quant elh retrai,
Sa boca plena d'orre thai.

Al rei Peire, de cui es Vics,
E Barsalon'e Monjuzics,
Man que meta totz sos afics
En destruire.ls pagans de lai,
Qu'ieu destruirai totz sels de sai.

Amiga, tant vos sui amics,
Q'az autras paresc enemics,
E vuelh esser en vos Fenics!
Qu'autra jamais non amarai
Et en vos m'amor fenirai.