Main PageTroubadours' ListingMore Works by Peire Vidal

The prosody guide is available as a book. Click here for details.

Be.m pac d'ivern e d'estiu
E de fregz e de calors,
Et am neus aitan cum flors
E pro mort mais qu'avol viu,
Qu'enaissi.m ten esforsiu
E gai Jovens et Valors.
E quar am domna novella,
Sobravinen e plus bella,
Paro.m rozas entre gel
E clar temps ab trebol cel.

Ma don'a pretz soloriu
Denant mil combatedors,
E contra.ls fals fenhedors
Ten establit Montesquiu:
Per qu'el seu ric senhoriu
Lauzengiers non pot far cors,
Que sens e pretz la capdella!
E quan respon ni apella
Siei dig an sabor de mel,
Don sembla Sant Gabriel.

E fai.s temer plus de griu
Als vilas domneiadors,
Et als fis conoissedors
A solatz tan agradiu,
Qu'al partir quecs jur'e pliu
Que domn'es de las mellors:
Per que.m train'e.m sembella
E.m tra.l cor de sotz l'aissella,
Don m'a leyal e fizel
E just pus que Dieus Abel.

D'onrat pretz nominatiu
Creis tan la soa valors
Que non pot sufrir lauzors
La gran forsa del ver briu.
Sei enemic son caitiu
E siei amic ric e sors.
Front, huelh, nas boch'e maissella,
Blanc pieitz ab dura mamella,
Del talh dels filhs d'Israhel
Et es columba ses fel.

Per zo.m ten morn e pessiu,
Aitant quant estauc alhors!
Pueis creis m'en gaugz e doussors,
Quan del sieu bel cors m'aiziu.
Qu'aissi cum de recaliu
Ar m'en ven cautz, ar fredors!
E quar es gai'et isnella
E de totz mals aips piucella,
Am la mais per San Raphel,
Que Jacobs no fetz Rachel.

En Fransa et in Beriu
Et a Peitieus et a Tors
Quer nostre Senher secors
Pel Turcs que.l tenon faidiu,
Que tolt l'an e.l vas e.l riu
On mondava.ls pechadors!
E qui ara no.s revella
Contr'aquesta gen fradella
Ben mal sembla Daniel
Que.l dragon destruis e Bel.

Vers, vai t'en vas Montoliu
E di.m a las tres serors,
Que tan mi platz lor amors,
Qu'ins en mon cor las escriu!
Vas totas tres m'umiliu
E.n fas domnas e senhors.
E plagra.m mais de Castella
Una pauca jovensella
Que d'aur cargat un camel
Ab l'emperi Manuel.

Francs reis, Proensa.us apella
Qu'En Sancho la.us desclavella
E gasta.us la cer'e.l mel
E sai tramet vos lo fel.

Per l'apostol qu'om apella
Sant Jacme de Compostella,
En Luzi'a tal Miquel
Que.m val mais que cel del cel.