Main PageTroubadours' ListingMore Works by Peire Vidal

The prosody guide is available as a book. Click here for details.

D'omes honratz, per qu'ieu fatz
Tal chanso viatz,
Bons reis, que prec qu'aprendatz.
E si.m demandatz:
Tan soven per que chantatz--
Quar es enuegz als malvatz
E gaugz a nos envezatz.

E sapchatz, s'ieu fos amatz,
Que n'auziratz esmeratz
Chantaretz prezatz,
Qu'era que sui malmenatz,
Fas meravelhatz
Motz ab us sonetz dauratz,
E no m'en val amistatz
Ni no chan mas de percatz.

Cors delgatz,ben enseignatz,
Merce n'ajatz. pietatz,
Vos la.n cosselhatz,
Que destreitz sui e cochatz.
Ai don', esgardatz
Mon cor e no m'auciatz,
Qu'enians e tortz e pechatz
Er, s'ieu muer dezesperatz.

Mielhs pagatz fora qu'om natz,
Si.l bais emblatz mi fos datz
O neis autreyatz.
E no vuelh que m'enqueiratz
On es totz mos gratz,
Que ben leu mal me.n faratz.
Quar soven fai cobeitatz
Falhir los plus ensenhatz.

Pus beutatz fa.ls plus senatz
Outracujatz, ben es fatz
Qui no.s te celatz.
Mas ieu sui ben encantatz,
S'ab mi dons parlatz,
Que no.m puesc moure del latz:
O ieu sui gilos proatz
O del tot enamoratz.

Ab us datz menutz plombatz
Nos a trichatz malvestatz,
Dont escassetatz
Nais. En Rainiers, no.us gicatz,
Qu'ades no fassatz
Que pros aitan quan vivatz.
Que rics hom joves serratz
Val meins que mortz soterratz.

Na Vierna, patz
Volgra.m fes mos Castiatz,
Qu'en Proensa sui tornatz
Morir cum lebres en jatz.

Neus e glatz car non restatz
Ja ven estatz. e bels pratz
Car non verdeiatz
Qu'ieu soi plus enamoratz
Per lieis cui embratz,
Que nostr'emperaire fatz!
Q'el a perdut, so sapchatz,
Set cens soutz, qu'anc non tenc datz.