Main PageTroubadours' ListingMore Works by Peire Vidal

The prosody guide is available as a book. Click here for details.

Pus tornatz sui em Proensa
Et a ma dona sap bo,
Ben dei far gaia chanso,
Sivals per reconoissensa:
Qu'ap servir et ab honrar
Conquier hom de bon senhor
Don e benfag et honor,
Qui be.l sap tener en car!
Per qu'ieu m'en dei esforsar.

E sel que long'atendensa
Blasma, fai gran falhizo!
Qu'er an Artus li Breto
On avion lur plevensa.
Et ieu per lonc esperar
Ai conquist ab gran doussor
Lo bais que forsa d'amor
Me fetz a ma domn'emblar,
Qu'eras lo.m denh'autreiar.

E quar anc non fis failhensa,
Sui en bona sospeisso
Que.l maltragz me torn en pro,
Pus lo bes tan gen comensa.
E poiran s'en conortar
E mi tug l'autr'amador,
Qu'ab sobresforciu labor
Trac de neu freida fuec clar
Et aigua doussa de mar.

Ses pechat pris penedensa
E ses tort fait quis perdo,
E trais de nien gen do
Et ai d'ira benvolensa
E gaug entier de plorar
E d'amar doussa sabor,
E sui arditz per paor
E sai perden gazanhar
E, quan sui vencutz, sobrar.

Estiers non agra guirensa,
Mas quar sap que vencutz so,
Sec ma domn'aital razo
Que vol que vencutz la vensa!
Qu'aissi deu apoderar
Franc'humilitatz ricor,
E quar no trop valedor,
Qu'ab lieis me posc'aiudar,
Mais precs e merce clamar.

E pos en sa mantenensa
Aissi del tot m'abando,
Ja no.m deu dire de no!
Que ses tota retenensa
Sui sieus per vendr'e per dar.
E totz hom fai gran folor
Qui di qu'ieu me vir alhor!
Mais am ab lieis mescabar
Qu'ab autra joi conquistar.

Bel Rainier, per ma crezensa,
No.us sai par ni companho,
Quar tug li valen baro
Valon sotz vostra valensa.
E pos Dieus vos fetz ses par
E.us det mi per servidor,
Servirai vos de lauzor
E d'als, quant o poirai far,
Bel Rainier qui.us etz, si.us par.