Main PageTroubadours' ListingMore Works by Peire Vidal

The prosody guide is available as a book. Click here for details.

Peire Vidal, pos far m'ave tenso,
No.us sia greu, si.us deman per cabal
Per cal razo avetz sen tan venal
En mains afars que no.us tornon a pro,
Et en trobar avetz saber le sen!
E qui ja veils en aital loc aten
Et en joven n'es atressi passatz,
Meins a de be que sia ja no fos natz.

Blacatz, no tenh ges vostre chan per bo,
Quar anc partis plait tan descominal!
Qu'ieu ai bon sen e fin e natural
En totz afars, per que.m par be qui so.
E s'ai m'amor meza e mon joven
En la meillor et en la plus valen,
No.n vueill perdre los guizardos ni.ls gratz,
Quar qui.s recre es vilans e malvatz.

Peire Vidal, ja la vostra razo
Non vueill aver a mi dons que tan val,
Que.ill vueill servir a totz jorns per engal,
E d'ela.m platz, que.m fassa guizardo!
Et a vos lais lo lonc atendemen
Senes jauzir, qu'ieu vueill lo jauzimen,
Quar loncs atendres sens joi, so sapchatz,
Es jois perdutz, qu'anc uns no.n fo cobratz.

Blacatz, no soi eu ges d'aital faiso,
Com vos autre, a cui d'amor non cal!
Gran jornada volh far per bon ostal
E lonc servir per recebre gent do.
Non es fis drutz sel que.s camja soven,
Ni bona domna sela qui.l consen!
Non es amors, ans es engans proatz,
S'oi enqueretz e deman o laissatz.