Main PageTroubadours' ListingMore Works by Peire Vidal

The prosody guide is available as a book. Click here for details.

Estat ai gran sazo
Marritz e cossiros,
Mas ar sui delechos
Plus qu'auzel ni peisso,
Pus ma don'a.m trames
Messatge, que.m tengues
A guiza d'amador.
A tan dousa sabor
M'a! quar denha voler
Qu'eu torn en bon esper.

Que, si Dieus mi perdo,
No puesc esser joyos,
Tro que m'en torn cochos
En la dousa preizo
On sa beutatz me mes,
Qu'es de semblans cortes
E de gaug ab dousor!
Per qu'ieu non vuelh ricor
De terra ni d'aver
Tan cum far son plazer.

Que tan m'es bell e bo,
Quant remir sas faissos
E.ls bels huelhs amoros,
Que re no sai on so!
Si m'a lassat e pres
E vencut e conques,
Que mos huelhs ni m'amor
No puesc virar alhor,
Ans quant la puesc vezer
Del tot mi alezer.

Dona, per Dieu del tro,
Pus aissi.m ren a vos,
Humils e volontos,
Vostr'amistat me do
Chauzimens e merces
E precs e bona fes!
E faretz vostr'honor:
Que mout ai gran paor
Qu'el talans m'apoder,
Ab cui no.m puesc tener.

Que.l cor ai tan fello
Vas liei qu'anc mala fos!
Quar per un comte ros
M'a gitat a bando.
Be.m par que loba es,
Quar ab comte s'empres
E.s part d'emperador,
Qui fag a sa lauzor
Per tot lo mon saber:
Mas qui ment no ditz ver.

Dieus sal l'onrat marques
E sa bella seror,
Qu'ab sa leial amor
Me saup gen conquerer
E plus gent retener.

Filha de rei, be.m pres,
Quar perdiei fals'amor,
Que'n gazanhei melhor
E que miels sap valer
E far e dir plazer.