| |
|||
| prosody | miscellaneous |
Del sieu tort farai esmenda Lieys que.m fetz partir de se, Qu'enquer ai talan que.l renda, Si.l platz, mas chansos e me Ses respieg d'autra merce! Sol suefra qu'en lieys m'entenda E que.l belh nien n'atenda. Ges per negun mal qu'en prenda De s'amistat no.m recre, Ans suefri c'ades m'acenda La pen' e.l danz que m'en ve. Faire.m degra qualque be, Mas no.s tanh qu'ieu la.n reprenda Si tot s'es vers qu'ilh mesprenda. Molt en cossir nueg e dia E no m'en sai cosselhar. Pero, si s'esdevenia, Gran talan ai qu'un baisar Li pogues tolr' o emblar! E si pueys s'en iraissia Voluntiers lo li rendria. Ben conosc qu'ieu no poiria Mon cor de s'amor ostar Per ira ni per feunia Ni per autra domn' amar. No m'en cal plus assaiar! Aissi cum li plaira, sia, Qu'ieu l'amarai tota via. El mon non es hom que tenha Tan apoderat amors, Que ges non vol qu'ieu retenha Los plasers ni las honors Qu'avia trobat aillors! Ans vol que sai mi destrenha Per tal que no.m vol ni.m denha. Belha domna, en cui renha Senz e beutatz e valors, Suffriretz qu'aissi m'estenha Lo desirs e la dolors Sivals dels plazers menors Mi faitz tant que joys m'en venha, Sol qu'a vos non descovenha. Chansoneta, vai de cors Dir a midons que.t retenha, Pus mi retener non denha. Dalfi, solatz et amors E cortes sens vos essenha Cossi joys e pretz vos venha. |