Main PageTroubadours' ListingMore Works by Peirol

The prosody guide is available as a book. Click here for details.

Mout m'entremis de chantar voluntiers
E d'alegrans' e de joy mantener
Mentre que fuy d'amor en bon esper.
Eras no i vey mon pro ni lo y enten,
Ni de midons mais secors non aten!
Tals desconortz e tals esmays m'en ve
Que per un pauc de tot joy no.m recre.

Gran mal mi fetz l'acuyndamens premiers
E.l belh semblan que ges non eron ver,
Qu'anc pueys non puec mon coratge mover!
Qu'en un desir suy ades solamen
Que de ren als grans enveya no.m pren.
E pus no.l platz que n'ai' autra merce,
A sofrir m'er lo trebalh en que.m te.

Ja no partrai de lieys mos cossiriers!
Per mal que.m do non li puesc mal voler,
Quar tant la fai sens e beltatz valer
Segon l'afan folley saviamen.
Mal o ai dig, ans folley follamen,
Quar anc Narcis, qu'amet l'ombra de se,
Si be.s mori, no fo plus fols de me.

Atressi.m muer entre.ls loncs deziriers
Qi.m fan soven sospirar e doler
Per lieys qui m'a gitat a non caler
E luenh d'esper m'a mes estranhamen,
Qu'esquivat m'a son privat parlamen.
Et hieu am la tant, qu'a la mia fe,
Quan veg mon dan, ges mi meteys non cre.

Ben sai quals es totz mos cosselhs derriers.
Pus del partir non ai ginh ni saber,
Ses son pezar, farai lo mieu plazer!
Amarai la midons per tal coven
Qu'el cor aurai l'amoros pessamen,
Mas la boca tenrai ades e fre.
Aquilh sivals non l'en dira mais re

Estarai donx cum lo penedensiers
Que re non quier d'aquo que vol aver.
A que.m tarda quar non la vau vezer
Irai lai doncs morir ad escien
Oc, qu'aital mort amarai eu soven,
Qu'estranhamen a gran plazer qui ve
So qu'ama fort, ja non ai' autre be.

Lo vers tramet midons per tal coven
Qu'a tot lo menhs, s'autre pro no m'en ve,
Quan l'auzira, li membrara de me.