prosody | miscellaneous |
Eu non lausarai ja mon chan! Mas si.us agrada ni bons es, L'amor, que m'a en son coman, En sapchatz grat, qu'a mi non ges, Car amors me guid' e m'enansa. E si.m da trabalh e pezansa, Eu viu jauzens, quan muor aman. Midonz per sa franchesa gran Plac que receup mon homenes, E.m fes e.m dis e.m promes tan Qu'ieu non cuidei c'om mi valgues. Mas eras estau en doptansa Que per non cur' o per viltansa M'oblit o qe.m met' en soan. Molt fui autz, mas ar vau baissan. Dire puosc q'enaissi m'es pres Com celui que vai joy sonian E quan rissida, non es res. On trobarai jamais fiansa En neguna bella semblansa Pois en aquesta trob engan Trop dic! non puesc als, que mort m'an Atendres e longa merces. Que farai donc deserenan Degra m'en partir si pogues, Mas, mentre n'estauc en balansa, Si me loigna desesperansa, Fin' amors m'apropch' atretan. Sofrir m'er la pen' e l'afan Totz temps, non pas dos jorns ni tres, Anz c'aillors vire mon talan, Qe.l maltraitz val totz autres bes. Sol de vos, don', ai deziransa Que.m donetz joy e alegransa! Cosseill el mon plus non deman. Ja drutz non conosca son dan S'esser vol savis ni cortes, Ni fassa ni diga semblan Que res contra sidons li pes! Car cel enqier sa malanansa Qui per orgoill cuida vengansa Penre aqui on hom no.l blan. Dona, ren no val ni enansa En amor trop long' esperansa! Qui ama, faire.n deu semblan. |