prosody | miscellaneous |
Pos entremes me suy de far chansos, Ben dey guardar que fals motz no.i s'entenda, E, s'ieu dic re que midons en grat prenda, Be m'en sera rendutz bos guazardos. Et agra.n tort si mos chans non l'es bos. Per que quar ylh m'a donat l'art e.l genh E so qu'ieu fatz non dei metr' en desdenh. E si tot m'es de semblant orgulhos Non ai poder que ves autra m'atenda, Que.l cor e.il huel me mostron que.il me renda Tant m'agradi de sas bellas faissos! E, quan m'en cug partir, no m'es nulhs pros, Que.l sieu'amors m'es denan qui m'atenh, Que.m fai tornar vas lieys, tan mi destrenh. Luenh m'es dels huelhs, mas del cor m'es tan pres Selha per cui soven planc e sospire Que, on plus n'ai d'afan e de martire, Dobla l'amors e nays e creys ades! E quar suy sieus no cug que m'enguanes, E fi me tant el sieu ensenhamen Per qu'ai respeyt que n'aura chauzimen. Ben fora sens si de lieys me lunhes Ans que.m laisses a la dolor aucire, Mas Amors vol qu'ieu sia francs suffrire E ja per ren non aia.l cor engres! Anc Dieus no fetz nulh hom qui ben ames Que non crezes mais Amor que son sen, Per que m'aven a far son mandamen. Anc nuls amans per sidons no sufri Tan gran dolor ni tan gran malanansa! Per merce.l prec que.m digu' a tal pessansa Si.l cor non a que.s melhur enves mi, Per que vengues plus viatz a la fi, Qu'assatz val mais morir al mieu semblan Que totz temps viur' ab pen' ez ab afan. Chansoneta, vai t'en ton dreyt cami Lay a midons en cuy ai m'esperansa E diguas li qu' aya qualque membransa De me quar l'am ses enjan ab cor fi, Qu'anc per ma fe, des l'ora qu'ieu la vi, Non ai mudat ni camjat mon talan, Ans l'am ades e la dupt e la blan. Seign' En Heralh de Polinac, montan Vai vostre prez a chascun jor del an. Bella-Guarda, de vos dauri mon chan Quar negus hom no pot mentir lausan. |