Main PageTroubadours' ListingMore Works by Peirol

The prosody guide is available as a book. Click here for details.

Si be.m sui loing et entre gent estraigna
Eu ai pensier d'amor en que.m conort,
E pens d'un vers cossi.l fass' e l'acort
Tal que sia bos e valens e fis!
Et on hom plus mos chantars mi grazis
E mieils me dei gardar que no.i mesprenda
Ni diga ren don savis me reprenda.

Non es nuills jorns qu'en mon cor non dissenda
Una dolsors qe.m ven de mon pais.
Lai joing mas mans e lai estau aclis,
E lai, sapchatz, que volri' esser fort,
Pres de midonz, sitot a vas mi tort!
C'ab bel semblan et ab doussa compaigna
Me dauret gen so qu'aora m'estaigna.

Ar ai assatz que plor e que complaigna,
C'a pauc lo cor no.m part quan mi recort
E mi soven del ris e del deport
E dels plazers qu'ela.m fetz e que.m dis.
A cum fora garitz s'adoncs moris
Que quand li prec que de mi merce.ill prenda
Sol vejaire non fai qu'ella m'entenda.

Ben ai razon que sofra et atenda.
Cum atendrai, pois lieis non abellis
Miels me fora, so cre, que m'en partis.
Partir non ges trop n'ai pres lonc acort.
Bona dompna, vostr'om sui tot a fort!
Et no.us cuidetz l'amors en mi remaigna,
Qu'a vos amar tem que temps mi soffraigna.

Lieis non faill res c'a pro dompna s'ataigna,
C'om no la ve que de lieis laus non port.
Bell' e gai' es e pros, per que l'am fort.
E doncs amors, cui totz temps sui aclis,
Plairia.il ja c'una vetz m'en jauzis!
Aquesta.il quier per don e per esmenda
O ja d'autra mais guizerdon no.m renda.

D'autre trebaill prec Deu que la defenda,
Mas sol un jorn volgra qu'ela sentis
Lo mal qu'ieu trac per lei sers e matis!
Qu'en greu perill m'a laissat loing del port.
E non vuoill ges qu'autra m'en ai' estort,
Car s'a lieis platz que ja vas mi s'afraigna
Anc hom non fetz d'amor genssor gazaigna.

Non laissarai, dompna, lo vers no.us port!
Qu'enaissi.m ten lo desirs en greu laigna,
Non pot esser que ja plus sai remaigna.