prosody | miscellaneous |
Camjat ai mon consirier, --Camge c'ai fag d'amia, Don ai fin joi vertadier Plus c'aver non solia. Mas non es de pretz sobrier! Ieu per que.n mentiria Qu'ieu aug dir' el reprovier! Qui non troba, non tria E qui pren no.s fadia. Entendre.m fazi' amors En folla ricaudia, En las riquesas ausors, Don mal mon grat sofria Penas e dans e dolors Si c'a totz jornz moria. Guardatz s'era be follors Quant ieu plus i perdia E meils m'i entendia Era.m sui amesuratz E sec ma dreita via. Qant que fos ma volontatz Plus aut que non devia, Ben dei esser castiatz Pel dan que m'en venia, C'aissi es dobla foudatz D'ome que no.s castia Pois conois sa follia. Per qu'ieu sai qu'estera be E fora cortesia Que ja hom non ames re Mas so que l'amaria. Preiars s'ataing e.s cove, Qui mesura metia, Mas sapchatz qui trop o te So es semblan que sia Orguoills e vilania. Era conosc et enten Qu'es bona compaingnia Can dui s'amon finamen Per leial drudaria, E cascus tot franchamen Ves son par s'umelia. Car amors non vai queren Enueg ni tricharia Mas merce tota via. Lai on ai mon bon esper M'atrai amors e.m lia, Don non aus ni puesc mover Mon dezir nueg ni dia. Ben pot ma domna saber C'aissi l'am ses bauzia, Que ren contra.l sieu voler Mos cors non pensaria Ni boca non diria. Ben m'en vai mas miels n'esper! Vai, chansos, dreita via A la bell' on q'ill sia. E di li que.l fas saber C'autra no voill que sia De mon joi garentia. |