home page ?


Dalfi, sabriatz me vos
Mostrar razonablamen,
Quant ha pro dona valen
Drutz cortes e pros,
Cora s'eschai
Que l'am plus ab cor verai
Quan lo ha fait ho enan
Diguatz m'en vostre semblan.

Peirol, leu m'es lo respos,
Quar ben sai certanamen
C'amistatz per jauzimen
Creis, et es razos,
Que maior jai
Ha drutz, pos sidonz ho fai!
E.l grans jois, c'a ses engan,
Fai ades l'amor plus gran.

Dalfi, ben sai e conos'
C'om, pos ama finamen,
Mor ades tro que.l joi pren,
Don plus es coitos.
E pueis estai
Lo dezirs, c'oltra no vai,
Non cre de negun aman
Que pueis am' ab fin talan.

Peirol, aiso metetz jos,
C'aprop l'afaire plazen
Trob' om fin aman soven
Mout plus volontos!
C'amors atrai
Aprop lo joi grant esmai,
E membre vos de Tristan
C'ab Yzeut morit aman.

Dalfi, vers es que.ill poizos
Que lor det beure Braiguen
La nueit per descauzimen
Lo fes angoissos!
Mas de mi sai
C'ochaizonatz en serai
E ben leu aurai hi dan
Quar mantenh ma razo tan.

Peirol, remanha.ill tensos,
Car vos o faitz ben parven
C'anatz falsedat cubren.
Datz vos ocaizos!
Ja no creirai
Que drutz cortes no am mai
Sidonz, pos no vai gardan
Vas leis de ren qu.il deman.

Dalfi, no sai,
Mas bon conseill vos darai,
Que si ben no l'ama tan
Sivals fassa.n lo semblan.

Peirol, ben sai,
E tant conogut vos ai,
Que.ls leials anatz jutgan
Segon vostre cor truan.