Main PageTroubadours' ListingMore Works by Peirol

The prosody guide is available as a book. Click here for details.

Quant Amors trobet partit
Mon cor de son pessamen,
D'una tenson m'asalhit,
E podetz auzir comen.
Amix Peirols, malamen
Vos anatz de mi lunhan!
E pus e mi ni en chan
Non er vostr' entencios,
Diguatz! pueys que valretz vos

Amors, tan vos ai servit,
E nulhs pechatz no.us en pren,
E vos sabetz quan petit
N'ai avut de jauzimen.
No.us ochaizo de nien
Sol que.m fassatz derenan
Bona patz, qu'als no.us deman!
Que nulhs autres guazardos
No m'en pot esser tan bos.

Peirols, metetz en oblit
La bona domna valen,
Que tan gent vos aculhit
E tan amorozamen,
Tot per mon comandamen
Trop avetz leugier talan
E no.us era ges semblan,
Tan guays e tan amoros
Eratz en vostras chansos.

Amors, anc mais no falhit,
Mas ar falh forsadamen!
E prec Dieu Jhesu que.m guit,
E que trameta breumen
Entre.ls reys acordamen,
Que.l socors vai trop tarzan,
Et auria mestier gran
Que.l marques valens e pros
N'agues mais de companhos.

Peirols, Turc ni Arabit
Ges per vostr' envazimen
No laissaran Tor Davit.
Bon cosselh vos don e gen!
Amatz e chantatz soven.
Iretz vos, e.l rey no.i van
Veiatz las guerras que fan!
Et esguardatz dels baros
Cossi trobon ochaizos.

Amors, si li rey no.i van,
Del Dalfi vos dic aitan!
Ja per guerra ni per vos
No remanra, tant es pros.

Peirols, maint amic partran
De lurs amiguas ploran,
Que, si Saladis no fos,
Sai remazeran joios.