Main PageTroubadours' ListingMore Works by Peirol: Joc Partit 34

The prosody guide is available as a book. Click here for details.

Pomairols, dos baros sai
Pros et ab bonas genz
Es l'uns noiritz et estai
Et es plus que valenz!
L'autr'estai entr' avol gen
Et a bon pretz valen.
Veirem si saubretz chauzir
A cal deu om mais grazir
Son bon captenemen.

Guionet, qui bos faitz fai
Entr' omes conoissenz,
Ges de si mezeis no.ls trai!
Car lo bos noirimenz
Lo fai larc et avinen,
Per qu'eu prez per un cen
Celui que.s sap enantir
Entre.ls crois tan que fai dir
Que pretz a engalmen.

Peire, cel qu'enans se trai
Tant que.ls meillors en venz
O fai meilz! c'om preza mai
Pels honratz venzemenz
Cel c'ab son afortimen
Venz maint baron valen
C'autre qu'als crois fai fugir!
Car leu si pot enantir
Qui non troba conten.

Guionet, ben vei com vai
Vostre razonamentz!
En guerra.m tornatz lo plai
Lai on vos sofraing sens.
Pero mult obra plus gen
Qui d'aigua fuec arden
Trai, que cel qui sap bastir
Un fuec d'autre, c'avenir
I pot leujeramen.

Peire Pomairols, pretz trai
Cel que dels conoissenz
E dels pros es caps! qu'eu sai
Que perdutz es l'argenz
Que l'autr' els malvatz despen.
E.l faiz torn' en nien,
Car pretz manda.ls pros servir!
E qui.ls pros sap enantir
N'a major grazimen.

Gui, qui conqier pretz verai
Entr' omes recrezenz
A cui negus bes non plai,
Majer afortimenz
Es, car ab croi noirimen
Vai son bon pretz creissen
Que s'el creis ab gen noirir.
C'un leon fai hom bordir
Qui lo sap noirir gen.

Pomairols, lo jutgamen
Faza d'aquest conten
En Reforzatz que sap dir
E far tot can deu grazir
Bos pretz enteiramen.

Guionet, per bon l'en pren!
Mas n'Alazais qu'enten
En tot bon pretz enantir,
Poncelleta prec c'al dir
Lo guar de fallimen.