home page ?


D'un sonet vau pensan
Per solatz e per rire,
E non chanter' ogan
Estiers per mon cossire,
Don mi conort chantan!
Qu'amors m'auci d'esmai
Quar m'a trobat verai
Plus de nuill autr' aman.

Sivals be.m vai d'aitan
Que ges no.m pot aucire
A plus onrat afan
Ni ab tant douz martire.
C'a tal domna.m coman
Qu'es la genser qu'ieu sai!
Bos m'es lo mals qu'ieu trai
Mas ill n'a pechat gran.

Ren per autrui no.l man
De so que plus desire,
Ni eu eus, tant la blan,
Re no l'en auzi dire.
Ans quan li sui denan
Maigntas vetz quan s'eschai
Dic! dona, que farai
No.m respon mas guaban.

Las com muor desiran,
Sos hom e sos servire,
Qe.m n'iria celan.
Maigntas vetz m'en azire
E dic per mal talan
Que tot m'en partirai!
Pois aqui eus trob lai
Mon cor on er'antan.

Li huoill del cor m'estan
A lieis vas on q'ieu vire,
Si c'ades on qu'ill an
La vei e la remire
Tot per aital semblan
Cum la flors c'om retrai
Que totas vias vai
Contra.l soleill viran.

S'una vetz tan ni qan
Eu fos estatz gauzire,
Sapchatz non es d'engan
Que soven eu sospire.
Domna, per cui eu chan,
Una ren vos dirai,
S'aqest vostr'om dechai
Anta i auretz e dan.

D'amor vos dic eu tan
Que bon respiech en ai,
E ja d'aqui en lai
Nuills hom no m'en deman.

Chansonet' ab aitan
Dreich a midonz t'en vai,
E digas li, si.l plai,
Que t'aprenda et chan.