Main PageTroubadours' ListingMore Works by Raimon de Miravalh

The prosody guide is available as a book. Click here for details.

Be m'agrada-l bels tems d'estiu
E dels ausels m'agrada-l chanz!
E-l fueilla m'agrad'e-l verians
E-ill prat vert mi son agradiu!
E vos, domna, m'agradatz mil aitans,
Et agrada-m qan fas vostres comans:
Mas vos non platz que re-m deingnes grazir,
Mas agrada-us car me muor de desir.

Per un desir, domna, reviu,
Que m'es de totz desirs plus grans,
Qar desir que-l rics benestas
Vostre cors desiran m'aiziu,
Qe mos desirs si dobles en baisans:
E puois tan be-us desir ses totz engans,
Ja no-m laises al deserier aussir,
Qe desiran deu om d'amor jausir.

Tot jausir d'autr'amor esquiu,
Mas de vos a jausir m'enanz,
Qu'ieu jau los bes e sel los dans
De vos que-m faitz jausen pensiu!
Tan soi jausenz de vos que nuills afans
No-m tol jauzir, que-l vostres bels semblans
M'esjausis tan que-l jorn que vos remir
Non puosc estar ses gaug vas on que-m vir.

Mas alques an virat mon briu
Lausengier que viro-ls amans,
E viron las domnas presanz
E manz jais viron en chaitiu.
E si-us viras, domna, per malparlans,
Vostre rics pretz tem que s'en vir truans,
Per que-s viron plazer en escarnir
E gran lausors s'en vir'en gran maldir.

Mas eu dic que, si tostems viu,
Tostemps dirai vostres comans!
E se-m dises vai o non ans,
Als vostres bels ditz m'omeliu,
Sol no-m digatz que remaingna-l demans,
Qe totz mos ditz enpassari'enans
Que per nuill dig, domna, pogues partir
Lo cor ni-ls ditz, ni-ls faitz de vos servir.

Per servir en ric seingnoriu
Es bons servire benanans!
Per qu'eu-s voill servir totz mos ans,
Et anc servidor menz antiu
Non ac la bell'a cui servi Tristans,
Anz vos farai de bels servisis tans,
Tro mos servirs me fass'en grat venir
O vos digatz, mon servidor azir.

De grat desir, domna, qu'ie-us jausis, ans
Qe-s vir per ditz mos servirs en soans,
Que servire, ditz on, qu'a dreic se vir
Qui son desir ab gaug no-i vol grazir.

Leial, be-m platz de mon Estiu l'enans,
Mas de midons es sa valors tan grans
Q'ieu e totz om li devem obezir
Per qu'ieu no-i voill ges Miraval mentir.

Mon Audiart am e pretz e dezir,
E tenrai lo tostemps, qui qe-m n'azir.