| prosody | miscellaneous |
Ben sai que per aventura M'es venguda-il razos q'ieu ai! Que chans d'auzel ni verdura Ni flors d'abril ni ros'en mai No m'agr'ogan tornat en jai, Si d'Amor, que tot'ira vens, No-m vengues alcus gauzimens, Per qe-il dei tot mon joi grazir. Tot lo maltraich e l'endura E-l lonc desirier e l'esmai Conosc qu'eras m'adrechura Cill que m'a donat maint esglai. Que val amors, s'om mal no-n trai Que la jelosi'e-l turmens, Q'ieu n'aic, e-l angoiss'e-l talens Mi fant doblamen esgauzir. Drutz, qui soven se rancura E tot enquer cant sidonz fai, Si conquier amor, no-il dura! Car non sap co-is ve ni co-is vai! Que dompna promet et estrai E ditz mainz plazers avenens Per tal q'entre las bonas gens Vuoill'om totz sos pretz enantir. S'autr'entendeire s'atura, Preian midonz que l'am ni-l bai, Tort i fai e desmesura, Mentre que de m'amor s'apai, Qu'il ne fai lo, so que s'eschai, Don ieu li rend merces cinc cens, E pois mieus es totz l'onramens, Cui cal, si-l fols s'i vol aunir A totz iorns cries e meillura E si val tant que non pot mai La bella que m'asegura De s'amor, on non faillirai. Lonc temps m'a tengut en assai E s'ie-n crezes sos malvolens Per so qu'eras sai q'es niens, Be-m pogr'a tort de liei partir. Dompn'ieu sui d'aital natura Q'en la sazon, qe mieills m'estai, Sui ves tota creatura Plus francs, e-n ves vos o serai! C'on plus mi tenretz coind'e gai, Vos puosc far mil vers sagramens Q'ie-us serai plus obediens E-us en volrai mil tans servir. Mais d'amic, pretz vos es e sens, Si voletz mos enantimens! C'anc Miravals no-us volc faillir. Mantel, qui partis engalmens Vostres adreitz chaptenemens, Cent dompnas en pogra garnir. Pastoret, vostres malvolens, On que sion, vuoill far sabens Q'ieu non am ren qe vos azir. |