home page ?


Selh, cui joys tanh ni chantar sap
E sos belhs ditz vos despendre,
A tal dona-ls fass'entendre
Qu'onratz li sia-l dons e-l pros!
Qu'assatz deu valer cortes nos
Dezavinen drudairia,
E s'ieu domnei a fadia,
Sivals ades enquier en luec gentil.

Leial domna, franch'ez umil,
Vuelh mais servir et atendre,
Que d'autra guizardon prendre,
Cui soven agues ops perdos.
Aital, ses bruig e ses tensos,
Guaya, de belha paria,
Corteza, ses vilania,
L'ai chauzida, ses fencha e ses gap.

E si tot ab lieys non acap
Lo joy que-m fa-l cor ensendre,
Per so no n'es mos gauchz mendre,
Pos de mi no mou l'ochaizos,
Qu'ieu no-m n'azir ni-n sui clamos!
Mas qui-ls dreitz d'Amor seguia,
Ben sai que razos seria,
S'ieu la tenh car, qu'elha no-m tengues vil.

Plazer li deu, quar entre mil
Donas vuelc a sa cort tendre,
E si-m laissa mais dessendre,
No-n parra sos captenhs tan bos!
Que ja van dizen a rescos
Qu'ieu non sec la dreita via!
Mas per dig d'autra que sia
Non puesc creire qu'en lieys m'amor mescap.

S'ieu de midons aic ren d'arrap,
No-ilh vuelh tort ni dreg contendre,
C'adobatz li sui del rendre,
Mas juntas e de genolhos,
Pero, s'ilh plagues que fos dos,
Molt feira gran cortezia,
E s'a lieys non platz, estia,
Qu'eu-n sui batutz plus fort c'ab un vergil

Menar me pot ab un prim fil
E-l sieu mezeis tort car vendre,
Qu'ieu no-m vuelh a lieys defendre,
Si tot m'en era poderos:
Que tant sui sieus per qu'es razos
Que s'elha en ren falhia,
Que-il colpa deu esser mia,
Et es ben dreg qe-m torne sus el cap.

Dona, Bezers ni Aragos
Ad ops d'amar no-us valria
Tan cum Miravals faria,
Si franchamen tenetz guarnit lo cap.

Si-m vol mal neguns dels baros
Per mon Audiart, lur sia
Que tan val sa senhoria
Ja per negu no-m partrai de son trap.

Quar es tan sos pretz cars e bos,
Ab n'Alazais vuelh paria,
E serai sieus tota via
Apres selha que no vol qu'om en gap.