Main PageTroubadours' ListingMore Works by Raimon de Miravalh

The prosody guide is available as a book. Click here for details.

Ben aia-l messagiers
E cill que lo-m trames,
A cui ren mil merces,
Si ja-m torn'alegriers:
Pero de mos mals cossiriers
C'ai aguz, sui tan sobrepres
C'a penas crei qe domna per amor
M'aia bon cor ni-m voilla fas honor.

C'ab mainz adreiz mestiers
Avia joi conques
Tal q'eu cre qe-m taisses
Si de lai fos entiers,
Qe massa ricx ni trop sobriers
Ni cugera que m'i nogues,
Q'eu esgardei domna de tal valor
Qu de beutat fos bass'e de picor.

Tal qe ja lausengiers
No s'en entremezes,
Qe mainz enois n'ai pres
Mentr'era druz leugiers!
C'adoncs cuiava c'us empiers
No-m tengues sa domn'en defes,
Qe maintas ves m'es tornat a follor
E maintas vez en joi et en dousor.

Per so m'era deriers
De toz los autres mes,
Qe mon loc no-m tolgues
Rolanz ni Oliviers,
Ni ges Orestains ni Ogiers
No cuiera qe s'i mezes!
Mas mi ten om per tan bon chausidor
Qe so q'eu voill ten chascus per meillor.

Ben cuidei fos estiers
Ma domna qe non es,
Qe toztemps li tengues
S'esbaudimenz premiers!
Sos fols cuiars es mensongiers
E consec la sa mala fes!
De son pauc prez li faza Deus menor,
Qe mon ferm cor m'a tornat en error.

Qe-ill fui al prim destriers
Et apres palafres,
Mas er creis tant l'arnes
Qe trop peza-l dobliers!
E puois ades baissa-l logiers
E-m sembla que l'afanz cregues,
No m'aura mais ab si per servidor
E lais me Deus mon meills trobar aillor.

Domna qe torn'en blasme sa lausor
No pot aver de Miraval la tor.

Mon Audiart sal Deus e sa honor,
Qe toz lo monz val mais per sa valor.