prosody | miscellaneous |
Contr'amor vau durs et enbroncs Per que mos chans es trop loindas, Q'ieu non sui tant leugiers ni vas Qe ja longamen atenda So don non posc esser segurs! Que de dompna, pois ment sos jurs, Non sap drutz en qe s'enprenda. E de qe-m dei alegrar doncs S'ab lieis, on es pretz sobeiras, Non puosc trobar ditz seguras Ni ai poder qe-l carvenda, Si-m fai tortz ni semblans escurs Q'el mon non es rocha ni murs Que contra liei mi deffenda. Ab fals digz et ab termes loncs Fant dompnas de cortes vilas, C'us non es tant francs ni humas Qe-l coratge no-ill n'ensenda Qand autre pren los sieus endurs! Mas ieu no-n fatz tant grans rancurs Ni pois mort non qier esmenda. Ara mentre q'es l'ombr'els joncs E lo temps es clars e doussas, Devon dompnas ben far certas Celz qe-il plai q'en lieis s'entenda! E s'ieu n'ai ditz mainz motz tafurs, Merces que fraing mainz fortz aturs Prec que ma dompna mi renda. Si cum la ros'entre mil troncs Es genser flors qe d'autres gras, Entre fals lausengiers trafas Estai midonz en sa tenda, C'us no-il ten dan d'aquestz perjurs! Gen comensset ab bos agurs Pretz que per lor non dissenda. Venganssa de colps ni d'estoncs Non es d'amor ni de sas mas, C'ab bels digz avinens e plas Taing que pros dompna contenda! Que, pos trop tenss'ab braus digz durs, Non es sos pretz tant cars ni purs C'om alques no la reprenda. Dompna-m don Dieus que defenda De Miraval las tors e-ls murs, Pois vostre talans es tant durs Que no-us platz q'encar lo-us renda. |