home page ?


Aras no m'en puosc plus tardar
D'un novel sirventes faire,
E qecs s'enprenda al cantar,
Si tot l'aur'es fresca ni-s plou!
Car sai en nostre repaire
Son drut e marit envazit,
Mas de lor hi a plus ferit.

Q'a Graignolet auzi comtar
Aisso, q'es greu a retraire,
C'us cavalliers venc dompnejar
Ab la moiller d'En Castelnou:
Mas lui non abellic gaire,
E, car lai intret ses convet,
Li a-l cap faillat e partit.

Aqel colp degran esqivar
Totz drutz e totz dompnejaire:
Que no-is taing ges qe per parlar,
Si-l drutz autra gerra no-il mou,
Qe-n leu-l maritz fust ni caire,
Mas privat en menatz e-n crit,
C'aissi-s devon vengar marit.

Mas eu no-m vuoill far entestar,
Q'ieu sui tant fis dompnejaire
E sai ma dompna tant honrar,
Que si mos seigner ditz que plou
Eu dic q'aital temps deu faire,
C'a midonz auria faillit
Si-n ren desdizia-l marit.