prosody | miscellaneous |
Bajona, per sirventes Sai be qu'iest vengutz mest nos, Et ab aquest seran tres, Qu'ieu vo-n avia fatz dos, Dont mant aur et mant argen Avetz guazanhat, Bajona E mant uzat garnimen E d'avol raub'e de bona! Aras, cant res no vo-n par, Cujatz vo-n renovelar. Car sai passes Barsaunes Entre-ls Catalans joios, Serdanha ni Girones, Say que vengues a rescos! Car s'anassetz a prezen, Ben agratz rossin, Bajona Mas venguetz com a sirven Aisi com sel que lairona, Doncx pessatz del retornar, Que sai no-us podetz selar. Nostre reis Aragones Que val mais de totz los pros, Vuelh renovelh vostr'arnes, E diguatz m'als companhos Que-l sieu gai captenemen Volgra say vezer, Bajona Qu'entre nos fug lo Joven Et us ricx no s'abandona, Per qu'ieu am mais domnejar Que mo mal senhor forsar. Si ja mais es tant cortes Que veyatz lo rei n'Anfos, Calmatz li cinc cens merces Qu'en una de sas maios Vos des calque bailimen! E s'eratz portiers, Bajona Pogratz penre venjamen Dels colps qu'e vostra persona Aitans prezes a l'intrar, Tant qu'era-us fan ranquejar. Als Catalans diguatz gen Non lur enuege, Bajona Que-l domnei plus avinen, Aitan quan mar revirona, Podon a Lombers trobar Ab n'Alazais, e-l plus car. |