Main PageTroubadours' ListingMore Works by Raimon de Miravalh

The prosody guide is available as a book. Click here for details.

Forniers, per mos enseignamens,
Auch dir, q'etz sai a mi vengutz!
E pois Dieus fai per vos vertutz
Qe-us voletz partir dels sirvens,
Be-is taing assatz
Que aprendatz
Cum vos formatz
Entre-ls prezatz
E que siatz
Bos chantaire.

Ops vos er tot primieiramens
C'oblidetz lanss'e dartz agutz!
Ospitals e monges tondutz
E totz homes obediens
Asseguratz
Que no-ls prendatz!
Jazers els blatz
Si'oblidatz
Ab mains pechatz
Que fai laire.

Los laitz deschausitz sagramens
Qe faziatz, qand eratz nutz
Delonc lo taulier remasutz,
E los vilans motz recrezens,
Amics, laissatz,
Qe no-ls fassatz
Ni no-ls digatz!
Que grans pechatz
Es, so sapchatz,
A retraire.

Ancar non sai vas cal dels vens
Iretz, tro que siatz mogutz,
Mas ben vuoill qe-m portetz salutz
A'n Raimon Drut q'es tant valens!
Que s'i anatz,
Segurs siatz
Q'encavalgatz
Vos en partatz,
Anz qe iscatz
Del repaire.

E si-us enqier dels vostres sens,
Amics, non estetz esperdutz,
Digatz q'a Lombers etz ahutz
A n'Alazais q'es tant plazens,
Qe sa beutatz
Fai-ls fols e-ls fatz
Tornar senatz,
E-ls plus menbratz
Outracujatz
De vejaire.

Joglars siatz
E meitadatz
Sens ab foudatz!
C'om trop senatz
Entre-ls prezatz
Non val gaire.

Los pros lauzatz,
E dels malvatz
Non retengatz
Lor amistatz,
Qe pieitz prendatz
C'us trichaire.