home page ?


Miraval, tenzon grazida
Voil que fassam, si-us sap bon,
E digatz mi ses faillida
S'om deu laissar per razon
Sidonz, pos es veillezida,
Ses negun'autr'uchaizon,
Respondetz d'oc o de non

N'Aesmar, tost hai chauzida
La part del prec e del pron:
Drutz q'a domna conqezida
No-n deu moure partizon,
Q'ades val mais la gauzida
Qan dura longa sazon!
Per q'aiqi non veig tenzon.

Miraval, molt m'es estragna
Dompna, pos ha-l pel ferran!
Per q'eu lau q'ab vos remagna,
Q'ambdui seretz d'un semblan:
Veils e veilla s'acompagna,
E joves ab joves van!
Per q'eu veill domnei desman.

N'Aesmar, pos e mesclagna
Voletz tornar vostre chan,
Ben voill sapch'om en Espagna
Qe vostra dompna val tan
Qe per nien se gazagna,
El partir no vos ten dan,
Per q'es bona viandan.