home page ?


Aissi-m te amors franc
Qu'alor mon cor no-s vire,
Ans l'ai ferm et estanc
Qu'ades en suj dezire!
Et on plus fort m'albire
Lo maltrag ni l'afan,
Ieu requier merceyan
A midons que no estric
Gaug ses voler enic
Per dig dezacordan
De lauzengier truan,
Cuj Dieus cas et azire

Pus fort quan vos remire
Ai, mon cor deziran,
Dona, mo ferm talan
De vos qu'ieu no vos dic!
Que pus qu'estrus m'afic,
Que estay esguardan
Sos huous que-lhs huelhs no bran
Tro l'es semblans que-ls gire:
E doncs, pus ieu no-m vire,
Ni del maltrag no-m planc,
Faitz me del be jauzire,
Qu'als non dezirei hanc.

Quar etz de pretz al sim
En la plus alta cima,
E de valor al prim
Que part las valens prima!
Abdos son senes crim
Que Beutatz vos escrima!
Vas vos mon cor aym
Que ren tan non s'ayma,
Que tan vos dezir prim,
Prima men, que m'aprima!
No faria hom tan prim
Fil prim ab prima lima.

E mon cor port la lima
Ab que mos cars motz lim,
E-ls fatz en cara rima
Quar de car loc los rim!
Latz lo cor m'es lagrima
Que sus del cor lagrim,
Que midons no m'estima
Et ieu, las, la estim,
Que mos mals no s'ayma
Et ieu sos bes aym!
E retrac sus en yma
E no vuelh dire ym.

Li entendedor vil,
On vils sabers s'avila,
Diran que fort sotil
De motz far s'asotila,
E qu'ieu trop vuelh dir d'il
E de prima e d'ila!
Mas tan fermat m'apil
On ferms sabers s'apila,
Que non tem dezapil
Que-ls nescis dezapila,
Tant ai ferm cor el fil
On ferms sabers s'afila.

Mas afilat s'afila
El dezafilat fil,
Mos cors d'amar se guila
Lieys, que non pren en guil:
Mos bos digz non esvila
Ni eu non los dic en vil!
E quar tan gen gentila
Gent ab son cors gentil,
Mos bos motz non esquila
Per lieys don muer ses quil!
E quar gen senhorila
Tenc car son senhoril.