| |
|||
| prosody | miscellaneous |
Del rei d'Aragon conssir, Qu'a mantas genz l'au lauzar E totz sos faitz vei grazir, Donc be-m dei meravillar Cossi pot far era treguas ne fis, Qu'anc chai chastels no fo per lui assis! Mais volc guerra-l filz del rei d'Etobia Lo jorn que venc cavalcar a Peria. Si son pretz vos enantir, Ges er no-s deu acordar, Anz li deu ben sovenir Que-l coms fetz Sancho passar En Proenssa, e si-l reis s'afortis, Mais n'er temsutz per totz sos enemis! Joves deu far guerr'e cavalaria, E quant er veillz taing ben q'en patz estia. Cui vic ogan ses mentir Mon Austoret amparar Si qu'anc pois no-l dec faillir Tro-l fetz sa terra cobrar, Cella que-ill tolc lo coms qu'es sos paris E sos oncles e sos peires vezis! Trenta castels ten de sa seingnoria Mal'er la fins se aquels no-ill rendia. A mo Joan auzi dir Que fetz n'Aimeric jurar Et a-m Bertran avenir Per lo comte guerrejar, Totz tres gaban que-ls marcs e-ls esterlis Faran metre els enaps e-ls bacis! E-l reis fara merce e gaillardia Se saint Gile mante e l'abazia. Guionet, si-m vols servir, Lo comte-m vai saludar, E di qu'a lui volc esdir Tro-m fetz Angles guerrejar! Non li fis mal, anz era sos amis, Mais d'un fizel monge de saint Daunis, Si ren m'a tolt, pois perdonat li sia, De tot aisso q'eu tenc en ma bailia. Quant que-m fezes esjauzir, Amors era-m fai plorar E-m tol maniar e dormir Per vos, domna, cui Dieus gar! No-us puos vezer mas be-us sui francs e fis Qu'autra del mon no-m plaz ni m'abellis! Mais am de vos sol la bella paria Que s'autra-m des tot quant eu li queria. Domna-il genser e-il meiller qu'anc hom vis, Ja no-us cuidetz que mos cors vos trais, ....................................... Anz am mais vos que mi ni ren que sia. |