Main PageTroubadours' ListingMore Works by Raimon de Miravalh

The prosody guide is available as a book. Click here for details.

De trobar ai tot saber
E de chantar votz e gejn
Tal que ja hom no-m n'essejn!
Say dir enuig e plaser.
Vers es que-m so d'aitan reconogutz
Qu'anc no fuy tan esperdutz
Que de solatz ajudar no-m saubes,
Don ren del tot midons laus e merces.

Car per leis jau a poder
E faz e dic e aprejn
Tan qu'entrels adreigs covejn
E-m faz a donas voler.
Pero no-m val negus dels mieus valgutz
Mas sol a luj qui m'adutz
Aitan d'onor qu'eu aver la poges,
Car il m'a tot, c'autra no-m dejna ges.

Car si n'ai mon bel parer
Vist d'autras, c'una non dejn
Don trob er onrat mantejn,
Mas d'aitan m'en desesper
Qu'eser no vuil per midons mantengutz,
Ab que sai fos mejnscresutz.
No ges per tal qe per leis so cortes
E-m platz lur pretz deforas e lur bes.

Qui de sa beutat ditz ver,
Tan bela dona no-s sejn,
E ja Dieus no-m salv ni-m sejn,
S'ieu anc la pogui veser.
Per zo-m son eu del tot a leis vendutz,
Qu'estiers no datz ni rendutz,
E si pogues, huymais fera merces
C'ab bel semblan a tot mon captal pres.

Tan sab ma dona valer
C'un'al sieu laus non atejn,
C'antan de bon esdevejn
Li mandet Deus retener.
Ai, sol amics fos per leis car tengutz
E si tam be fos cresutz
.......................................
.......................................