Main PageTroubadours' ListingMore Works by Raimon de Miravalh

The prosody guide is available as a book. Click here for details.

A penas sai don m'apreing
So q'en chantan m'auzetz dir!
Cum pieitz trac e plus m'azir
.........................................
Gardatz, qand er qi-m n'enseing,
S'i sabrai esdevenir
.........................................
Que ies de saber no-m feing,
Ni nuills hom no-i pot faillir
.........................................

Lo plus necis hom del reing
Que lieis veia ni remir,
Deuri'esser al partir
.........................................
E doncs ieu que l'am ses geing,
So sai be, m'en dei jauzir
Pois tant grans valors la seing
Que nuill autr'amor non deing,
Ni ses lieis non puosc garir
De la dolor que-m destreing.

Anc a nuill fin amador
Non cuig mais esdevengues,
Que de dompnas no-m ven bes,
Ni blasmar no-m puosc de lor!
Una-m tol lo joi d'aillor
E del sieu no-m dona ies,
Ni d'autra no m'a sabor!
Pero per la so'amor
Sui plus gais e plus cortes,
E-n port a totas honor.

Ben sai que per sa ricor
Mi tol so c'anc no-m promes,
Et ieu non sui tant apres
Qe miei prec m'aiont valor!
Mas aisso fraing ma dolor,
Que lai si para merces
On faillon tuich valedor,
Mas ill a tant de lauzor
Que ben l'er grazitz e pres
Lo mals en luoc de doussor.

Tuich cist trobador egal,
Segon qu'ill ant de saber,
Lauzon dompnas a plazer,
E non gardon cui ni cal!
E qui trop plus que non val
Lauza sidons, fai parer
Qu'escarn ditz e non ren al!
Mas ieu n'ai chausida tal
C'om no-n pot ren dir mas ver,
Si doncs no-n dizia mal.

Dompna, ben cortes jornal
Fai lo jorn qi-us vai vezer,
Que puois no-is pot estener
Sue no-us port amor coral!
Mas non ies tuich per engal,
Qe-il fals non podon voler
So que volem nos leial,
Per so viura-n de cabal
Cals c'ab engan vos esper,
S'ailor non pren son ostal.

Q'ieu non cossir de ren al
Mas de servir a plazer
Lieis de cui teing Miraval.

Deus benediga-l Leial!
Eu en cors volgra vezer
Cel cui port amor coral.