prosody | miscellaneous |
S'a mon Restaur pognes plazer, Tant qu'il me volgues restaurar Lo dan q'ieu ai pres per amar, Mais en feira son pretz valer, C'autre bes, so me par, noi faill Mas merces; s'ieu en tal miraill Mi pogues mirar, grant honor M'agra deus faich de la gensor, Don ai estat tant volontos De liei servir totas sazos. Pois mon Restaur non puosc vezer Lo douz ris nil plazen esgar, De mos huoills non sai mais que far, Q'aillors nom poirion valer; Quant ieu nol vei, soven badaill E quant ieu cuich dormir trassaill, E prenc los draps el cobertor E quant m'esveill sospir e plor Puois chant per leis e sui joios Quant mi soven del gen respos. Mos Restaurs a pretz e saber E cortesia e gen parlar, Tant qu'a chascun se fai prezar, Per que sos pretz deu mais valer E s'ieu n'agues joya o fermaill Plus fora rics d'un amiraill, C'ades vei doblar sa valor En fin pretz et en gran lauzor Per qu'ieu n'estau plus cossiros Quant no vei sas bellas faissos. Mos gens Restaurs a en poder Totz los bos aips qu'hom pot pensar, E sap lai, os taing, mieills honrar E plus cortesamen valer, Per que vas lieis no m'anuaill De servir, e s'ieu n'ai trebaill, Fatz a lei de bon sofridor, Per que fora dreitz e razos Quem n'avengues qualqu'onratz dos. De mon Restaur nom desesper, Anz voill en sa merce estar E servir e merce clamar Que bos servirs mi deu valer; Sis fai tant que per lieis mais vaill, En sui de plus avinen taill Ves midonz et en ves amor Pel fin pretz e per la ricor Qu'es en lieis rics e cabalos E creis ades totas sazos. Chansoneta, vai tost e cor E diras m'a l'una seror, En cui es fis pretz cabalos, Que trop atendres non es bos. |