prosody | miscellaneous |
D'un salut me voill entremetre Tal que a midonz sapcha dir Tot mon talan e mon desir El ben el mal mescladamen, Q'eu n'ai el ioi el pessamen; Car eu sai ben, s'ill o saubes Com l'am senz cor galiador, Quem penria per servidor Sivals, o n'auria merces. E puois anar n'i puos, per letre Lail voill mandar, que sovenir Li deuria del gent servir Q'ai faich e faz de bon talen; E dobla ades mon pessamen De lei servir, si ma'aiut fes; Ni no fo anc nulz amador Qui fos tan leials vers amor: Q'eu am e ges no trob merces. Nom poiria midonz demetre Nulz mesfaiz e sill puos plevir, Car anc vers lei nom vit faillir, Se trop amar n'es faillimen, Sim trai fin'amors a garen; E se lo ver dir en volgues, Ben sai qem fora valedor Lo genz cors gais de la genchor A cui fos anc clamat merces. Per que mi plaz saluz trametre A mon Restaur que sap grazir Toz los bos faiz et enantir Son pretz ab ric captenemen: Com pogra donc far faillimen Ves mi qu'el seu servir sui mes Non sai ni d'aicho n'ai temor, Car tant i a sen e valor Per q'eu dei ben trobar merces. Mon cor non puosc aillors ametre, Ni nom puosc ges de leis partir; Que farai donc tot dei soffrir Pena e trebaill cubertamen Tant que merces e chausimen En prend'al seu cors ben apres, Qui es genzer q'en mirador Se mir. s'ab merce nom socor, Ben cuit q'el mon non es merces. Car qui es leials servidor De bon cor envers son seignor Deu ben per dreit trobar merces. |