| |
|||
| prosody | miscellaneous |
Ges per freg ni per calor Ni per pascor ni per fueilh Non ai ioi mas don mi sueilh: De leis qe salvan s'onor Ha de totz grat e l'ampara, E non si trai ni ss'esgara Vas desavinen follor, Anz li es salvag'e fèra, Per q'ieu mans ionctas li·m ren, Qar anc nuilh galiamen No·m fes ni·s penset enqèra. A, per pauc, quar no·m secor, Non muer e de mi no·m tueilh, Qar, si·s dolges com ie·m dueilh, Furan leu plus sofridor Tut ll'afan qe non son ara. Be·m par qe non es amara, Anz m'a tan doussa sabor Q'ab un plazer m'en lauzèra Qe·m fezes, segen trecen Enuecs part lo pensamen, E ia de leis no·m clamèra. Chausit ai en la meilhor Qe donneia ni acueilh, E prec li no·m mostr'orgueilh Ni gard vas mi sa ricor Ni no li sia trop cara Merces, qe no·i fon anqara, Pos mi ac per servidor, Qar ben sap q'ieu non nasqèra Mas per far son mandamen, Per q'el sieu bon chauzimen Segrai, si mal o bon m'èra. Miells de donna e miells d'amor, Miells de tot qan mais dur vueilh E miells d'autra qe·s despueilh, Miells de plazer d'amador, Miells de be q'om vei ni gara, Miells est de totz miells vos ara E miells de fina lauzor, Qar totz miells en vos s'esmèra, Miells de prez, miells de ioven, Miells de valor, miells de sen, S'un pauc de merce hi èra. Si las lagremas q'ieu plor Visson cazer li vostr'hueilh Ni vissetz, donna, com mueilh De l'aiga cauda qe·m cor Per la bocha e per la cara, Non cug fossetz tan avara Non acses qalqe dolor Al cor, qe merce·us toqèra, Don foram pueis tan iauzen Qe per autr'esbaudimen Negus son ioi non camièra. Ni fin'Amors no pausèra En dos cors, mon escien, Tro de dos feses un gen, Amors qe lonc temps hi èra. |
Metrical pattern: 556