Main PageTroubadours' ListingMore Works by Rigaut de Berbezilh

The prosody guide is available as a book. Click here for details.

Lo genz temps m'abellis e-m platz,
E-ill ramel cargat de verdor
Que-l cor mi tornon en douzor
D'un ioi qui-m meillur'e-m reve,
E chant meceiant, car cove,
Si tot Amors non vol mon pron,
Que ill clam merce e ma chanzon
Per restaurar los mals e-lls danz
Qu'avia pres ab bels semblanz.

Mala fui tant enamoratz
Qu'anc pois iorn non fui ses temor,
E si francheza no-m n'acor
Non sai negun conseil e me.
Si sai, car clamarai merce
Ma bona domna cui hom son,
Que-m don un bais en guizardon,
Et er lo gaugz mager mil tanz
Que si-l m'agues donat enanz.

Loncs temps aurai sufert em patz
Per mon Bel Vezer grieu dolor,
Et anc mais non vist amador
Qui no-s camges mas sol quant me,
Quez eu sui cel qui no-m recre
D'amar leis a cui ai fag don
Ab fin cor e leial e bon
De mi, per far totz sos comanz,
Tant es adrech e gen parlanz.

A domna non eschai beutatz
Si non ten en car sa valor,
Qu'avol gen e fol parlador
Fan cuiar als meillors tal re
Per que dechai sos pretz desse
E-l semblanz adutz l'ochaizon,
Si tot del fag si ditz de non,
Per qe non deu sofrir demanz
D'ome, si non l'es honors grans.

Domna vol c'om sia privatz
E que-s gard de dire follor
Pos enquer lo fin gaug d'amor,
E que sapcha far miels de be,
Et aital amic vol e cre
Et als autres deu dir de non,
E fai o per bona razon,
Quar chascuns ditz qu'es fiz amans
Mas li plus regnon ab enganz.