| |
|||
| prosody | miscellaneous |
Atressi con l'orifanz, Que quant chai no·s pot levar Tro li autre, ab lor cridar, De lor voz lo levon sus, Et eu voill segre aquel us, Que mos mesfaitz es tan greus e pesanz Que si la cortz del Puoi e lo bobanz E l'adreitz pretz dels lials amadors No·m relevon, iamais non serai sors, Que deingnesson per mi clamar merce Lai on preiars ni merces no·m val re. E s'ieu per los fis amanz Non puosc en ioi retornar, Per tostemps lais mon chantar, Que de mi no·i a ren plus, Anz viurai com lo reclus, Sols, ses solatz, c'aitals es mos talans, E ma vida m'es enois et affans E iois m'es dols e plazers m'es dolors! Qu'eu non sui ges de la mainera d'ors, Que qui be·l bat ni·l te vil ses merce El engrassa e meillur'e reve. Ben sai c'Amors es tan granz Que leu mi pot perdonar S'ieu failli per sobramar Ni reingnei com Dedalus, Que dis qu'el era Iezus E volc volar al cel outracuidanz, Mas Dieus baisset l'orgoill e lo sobranz! E mos orgoills non es res mas amors, Per que Merces me deu faire socors, Que mant loc son on rasos venz merce E luoc on dreitz ni rasos non val re. A tot lo mon sui clamanz De mi e de trop parlar, E s'ieu pogues contrafar Fenis, don non es mais us, Que s'art e pois resortz sus, Eu m'arsera, car sui tan malanans E mos fals ditz messongiers e truans! Resorsera en sospirs et en plors La on beutatz e iovenz e valors Es que no·i faill mas un pauc de merce Que no·i sion assemblat tuit li be. Ma chansos er drogomanz Lai on eu non aus anar Ni ab dretz oillz regardar, Tan sui conques et aclus. E ia hom no m'en escus, Miels de domna, don sui fogiz dos ans! Ar torn a vos doloros e plorans! Aissi co·l sers, que, cant a faig son cors, Torna morir al crit dels cassadors, Aissi torn eu, domn', en vostra merce, Mas vos non cal, si d'amor no·us sove. Tal seingnor ai en cui a tan de be Que·l iorn que·l vei non puosc faillir en re. Belh Bericle, ioy e pretz vos mante: Tot quan vuelh ai quan de vos me sove. |
Metrical pattern: 680