prosody | miscellaneous |
Lo nous mes d'abril comensa Apres la freidor E li ausel son chantador, Qu'atendut an en parvensa Lo pascor. Miels de dompna, atretal entendensa Aten de vos ab ioi et ab temensa, C'apres los mals c'ai traitz durs e cosenz M'en veingna bes amoros e plasenz. C'aissi con totz l'anz agensa Per foill'e per flor, Val mais lo monz per Amor, Et Amors non a valensa Ni valor, Miels de domna, ses vostra mantenensa, Quar de totz bes estatz grans e semensa Et en vos es beutatz, valors e senz! Mas per Amor es plus valors valenz. Tan aves de conoissensa Per que-us fan seingnor Amors, Iovenz ab Onor E-us portan hobediensa Chascun ior. Miels de domna, doncs voillatz c'Amors vensa Vostre dur cor de bella captenenssa, Que ben sabetz que totz enseingnamenz Es en amor fis e comensamenz. Aver coven eschazensa A fin amador E preingn'en pas la dolor, Quar greu er c'ab Amor tensa Que non plor. Miels de domna, en aquesta crezensa Estauc ades e fas ma penedensa, Tant que-us plasa lo mieus enansamenz De ditz ses faitz, ab doutz esgartz plasenz. Tot atressi con Durenssa Pert e mar maior So nom, que longeis non cor, Eissamenz pert ses faillenssa Sa color, Miels de domna, denan vostra pressensa Autra beutatz, ses tota retenensa, Ves la vostra, que tant es avinenz Qu'eissamenz creis con la lun'es cressenz. Miels de domna, s'ieu sui sai vas Palensa M'arma e mon cors vos roman en tenensa: El nom d'amia vos er obedienz Ab que cresatz de sos enseingnamenz. |