| |
|||
| prosody | miscellaneous |
Tot atressi con la clartatz del dia Apodera totas altras clartatz, Apodera, domna, vostra beltatz E la valors e·l pretz e·ill cortessia --Al mieu senblan--totas celas del mon, Per que mos cors plus de vos no·m cambia De tot bon cor vos servir et onrar, Aissi com cel que pass'un estreit pon Qui non s'auza nulla part desviar. Qui dreit cami seg de ren non desvia, Per q'eu m'en sui del tot aseguratz, E s'ab amor deu valer liautatz Eu sui ben cel qui mieils trobar deuria Merce del plus leial amic del mon, Qu'en mi non es enianz ni tricharia Ni·m trobaretz mais enian, aiso·m par! Dont si·m destrui vostr'amors ni·m confon Iamais no·m voil de servir esforzar. E pois vos vi, domna, vos ai servia, Mas una res es se vos m'enganatz: Mieus er lo danz e vostr'er lo pechatz E pois auretz del dan una partia. Ben lo dizon tuit li savi del mon Que cel a·l dan cui es la seingnoria, Per que·m devetz, domna, del dan gardar, Que vostre sui e per vostre·m respon Per far de mi zo c'om del sieu deu far. Domn'es de mi, qu'eu no·us auz dir amia Car no i es devers vos l'amistatz, Per qu'eu m'en sui vergoingnos e iratz, Car d'amor es tan pauca ma iauzia De vos, que mais dezir que ren del mon! C'aissi m'a tot Amors en sa baillia Qu'enz mi non pot nuill'ochaizo trobar, Ni el meu cor nuls enianz non s'escon De que ia·m puosca Amors ochaizonar. Mas ieu consir si merces m'en valria O genz servirs o prez o amistatz, Qe ben soven trespassa volontatz E pot esser qe merces l'en penria De mi qi l'am mais d'altra ren del mon! Ni non es dreitz, si tot hom se fadia, C'om se deia per tant desesperar, Que·l sieu douzor ai respieg que m'avon Amor e ioi, se tot me fa tardar. |
Metrical pattern: 814