| |
|||
| prosody | miscellaneous |
Tuit demandon qu'es devengud'Amors Et eu a totz dirai-ne la vertat. Tot eissamen con lo soleilz d'estat, Que per totz locs mostra sas resplandors E-l ser s'en va colgar, tot eissamen O fa Amors, e quant a tot sercat, E non troba ren que sia a son grat, Torna-sen lai don moc premieramen. Amors o fai si com lo bons astors Que per talan no-s mou ni no-s debat, On tuit li ben del mon son asemblat, E no-i faill ges Amors quan tal la pren. Car senz e pretz e larguess'e valors E tut bon aip i eron aiostat Ab fin'amor per far sa voluntat, Et i era iois, domneiars et honors! Tot eissamen con lo falcs que deissen Vas son auzel quant l'a sobremontat, Deissendia ab dos'omilitat Amors en cels c'amavon lialmen. E per aisso voill sofrir las dolors, Que per soffrir son main ric ioi donat E per sofrir maint orgoill abaissat E per sofrir venz hom lauseniadors, C'Ovidis dis el libre que no men Que per soffrir a hom d'amor son grat, E per soffrir son maint tort perdonat E sofrirs fai maint amoros iausen. E pois, domna, tan grans es vostr'onors Et en vos son tut bon aip asemblat, Car no-i metetz un pauc de pietat Consi fezes a mon maltrat secors C'aissi com cel que-l focs d'enfern espren E muer de set ses ioi e ses clartat, Atresi muer e tem n'aiatz peccat Si m'ausies, puois nuills no-us mi defen. Pros comtess'e gaia, ab pretz valen, Que tot'avetz Campaign' enluminat, Volgra saupsetz l'amor e l'amistat Que-us port, car lays m'arma e mon cor dolen. Bel Paradis, tuit li douce reingnat Aurion pron del vostr'enseingnamen. |