Main PageTroubadours' ListingMore Works by Sordel de Goit

The prosody guide is available as a book. Click here for details.

En Sordell, qe vos es semblan
De la pro comtessa prezan
Qe tuit van dizen e gaban
Qe per s'amor es sai vengutz,
E cuiatz ans esser sos drutz
Q'en Blacatz q'es per leis canutz.

Peire Gilhem, tot son afan
Mes Dieus en leis far per mon dan,
E las beutatz qe autras an
Son nientz, e.l pretz es menutz:
Ieu e Blacatz fossem pendutz
Anz qe nuls i fos avengutz.

En Sordell, anc entendedor
No sai vi mais d'aital color
Com vos es! qe.lh autr'amador
Volon lo baizar e.l iacer,
E vos metes a no caler
So q'autre drut volon aver.

De leis vueilh solaz et honor,
Peire Gilhem, e si d'amor
I mesclava un pauc de sabor,
Per merce e non per dever,
Qi.s volges ages tot l'aver,
Sol q'ieu n'ages aqel plazer.

En Sordell, plus amesuratz
Vois faitz d'amador q'anc fos natz!
E s'el coms es aseguratz,
El s'en poiria ben pentir!
Qar autre n'auzetz escarnir,
Sordel, s'om vos o auzes dir.

Peire Gilhem, vos derrengatz
A lei d'ome cui jois non platz!
Mas el coms es tan enseinhaz
Que d'aisso no.l qal mens dormir!
Q'om deu so celar e cobrir
Qe no.s tainh vezer ni aucir.

Sordel, fort sap pro d'escremir
Qi.s pot de vostre colp gandir.

Peire Gilhem, ben sai sufrir
Lo mal d'amor e.l ben jauzir