Main PageTroubadours' ListingMore Works by Sordel de Goit

The prosody guide is available as a book. Click here for details.

Non pueis mudar, qan luecs es,
Q'ieu non chant o no gronda
Qe.l baron si sont espres,
Entr'els an conprat fonda.
En coms, tot assesmat es
C'om vos rasa e tonda
En redon
Per piez puiar contramon.
En Raimon,
Menbre.us d'en Peire Bremon.

En coms, aitant hay apres:
Qe tals es en Gironda,
Qi.l mieilh de vostre paes,
E vostra cort rebronda.
Am lur rendas e lur ses,
Si Dieus no vos avonda,
Trosq'al fon
Chascus a cor que.us rebron.
Mas bauc son,
Qar n'atendon l'aurion.

Se cai ven . . .
Qi fon seinher d'Argensa,
Coms, ben sai que seres duc
Clamatz, a ma parvensa,
E qe volares hueilh cluc
De Roine trosq'a Vensa,
Qui qe n'uc.
Chascus ha cor qe.us peluc,
Si q'el cuc
Remanran blanc li pecuc.

Ben sai si lor e . . .
De tan n'ai sovinensa,
Qe fols plus caus d'un sanbuc
Sai qe n'a penedensa,
Qan veires al primer uc
Trapenar sa valensa
Del faduc,
Qi mal sembla del Bauz n'Uc,
E ses truc
Val mens q'om mortz en tauc.

. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .
. . . . . . . . . . . . . . . . . . . .

Aitan aug dir en Blacatz,
Con qi non i mentria:
S'als pros Provensals presaz,
En q'aves seinhoria,
Co qe tolles rendias,
Chascus vos amaria
Lialmen:
Pero vos son desirven,
Qar soven
Scorjatz la croz per l'argen.