| |
|||
| prosody | miscellaneous |
Qui be.is membra del segle qu'es passatz Con hom lo vi de toz bos faitz plazen, Ni com hom ve malvatz ni recrezen Aquel d'aras, ni com ja restauratz Non er per cel qi vendra plus malvaz, Totz hom viura ab gran dolor, menbran Cals es, ni fo, ni er d'aissi enan. Mas non es dreitz c'om valenz ni prezatz Si recreza per aital membramen, Anz taing s'esforz tot jorn plus vivamen Com sufra.l fais de pretz, qu'es mesprezatz! Car cel n'a mais que plus fort n'es cargatz, E car es dreitz que s'esforco.il prezan De ben, on plus l'avol s'en van laissan. En plus greu point non pot nuillz esser natz, Com cel que pert Dieu e.l segle issamen! Tot aital son li trist malvaz manen, C'ant mes a mort domnei, joi e solatz! Tant los destreing nonfes e cobeitatz, C'onor e pretz en meton en soan, E Dieu e.l mon en getan a lur dan. Ai, com pot tan esser desvergoingnatz Nuls hom gentils, que an enbastarden Son lignage per aur ni per argen Qe l'avers vai leumenz e la rictatz, E.ill vida es breus, e la mortz ven viatz! Per c'om degra lialmen viure, aman Deu, retenen del mon grat, gen regnan. Dels maiors mou tota la malvestaz, E pois apres de gra en gra dissen Tro als menors, per que torna a nien Jois e pretz, si que, qui pretz vol ni.l platz, Pot n'aver leu, car tan n'es granz mercaz Que per cinc solz n'a hom la peza e.l pan: Si.l tenon vil li ric malvaz truan N'Agradiva, qui quez estei malvatz, Per vos azir malvestat et enjan Et am valor e joi e pretz e chan. Al rei tramet mon sirventes viatz, Cel d'Aragon, que.l fais lo plus pesan Sosten de pretz, per que.l ten en treman. |