Main PageTroubadours' ListingMore Works by Sordel de Goit

The prosody guide is available as a book. Click here for details.

Mant home.m fan meravilhar,
Car soy d'aitan pauc enveyos,
Car degun aver no m'es bos,
Mas cant per metr' o per donar!
Car qui ten son thezaur entier
Mil marc non valon un denier,
Car nulh avers ad home pro non.te,
Mas so qu'en met per pretz o per merce.

De trop sobras si deu garar
Qui vol esser valens ni pros,
Ni de sofracha vergoinos!
Car qui a fag e no pot far
Vieu malastrucs ab dol sobrier!
Per que.s deu metr'el dreg sentier
De mezura ap pretz qui pretz mante,
Que.l trop no.l tanh e.l pauc y descove.

Lunh pretz cort non pretz un denier!
Mas qui vol aver pretz entier
Sapcha metr' en son afar sobrefre,
Que so qu'enpren puesqu'en pes tener be.