prosody | miscellaneous |
Per re no.m puesc d'amor cuydar Qu'enquer non aya jauzimen, Qu'anc no.m fes amar per nien Tan lonjamen, ses cor camjar, La plus corteza e la plus guaya E la plus plazen que Dieus aya Per que.lh grazisc los mals qu'ieu tray Pels plazers qu'aten que n'auray. Be grazirai doncx, quan venran, Los bes, pus los mals grazisc tan. Be mi dey doncx d'amor lauzar, Que.m fes chauzir la plus valen Del mon e la plus conoissen Qu'ab ben dir et ab gen parlar Te tota la gen et apaya, Gardan son bon pretz que non chaya. Per qu'ieu fatz orguelh ben o sai, Quar l'am! mas, per Dieu, no.n puesc may! Qu'aitan be pot far fin aman Amors del petit cum del gran. Doncx non deu trop ricor gardar Dona, quar un non a en cen Ric home que am finamen, Ans cuian qu'om los dey'amar, Per qu'ieu prec midons que no.lh playa Ricx hom, ni vas si non l'atraya, Quar tost ven s'amors e leu vay! Mas a mi que no suy ricx play, Que.l mals qu'ieu trac per lieys tot l'an M'es honors si tot m'i ai dan. Ab tot'autra gent sai estar, E sai aver captenemen! Mas ab lieis que.m fora plus gen No sai que.m dey dire ni far! Qu'ieu non ay l'ardit que.lh retraya Cum l'am de fin'amor veraya: Sabetz per que quar paor ai Que l'aculhir e.l solatz guay Qu'elha.m fai e lo bel semblan Perdes, si l'anava preyan. Sabetz a que pot hom triar Bona dompna qu'a pretz valen Quan degus non a l'ardimen Que l'auze s'amor demandar! Mas quant ela es fol'e savaya, Quascus la preya e l'asaya, E sembla que alcus li play Als fols captenemens qu'ilh fay! Mas a bona dompna prezan Auza hom greu dir son talan. S'ista chansos a midons plai, Ieu ai en cor qu'en fassa may. |