prosody | miscellaneous |
Qan an plus creis, dompna, .l desiriers, Don languisc qar no.m faitz amor, De lauzar vostre prez ausor Creis plus mos cors! car jois entiers No.m pot ges vinir, amija, De vos, si.l prez s'en destrija! Q'aitan car teing vostre fin prez valen Com am ni voill vostre cors car e gen. Aital m'autrei, fis, vertadiers, A vos q'etz ses par de valor, Q'eu am mais morir ab dolor, Qe de vos mi veng'aligriers, Q'al fin prez q'en vos abrija Puesca dan tener! e si ja- Mais me trobaz vas vos d'autre talen, Ja non aiaz merce ni chausimen. Q'amar non pot nuls cavaliers Sa dompna ses cor trichador, S'engal lei non ama sa honor! Per qe.us prec, bels cors plazentiers, Qe pauc ni gaire ni mija Non fassaz de re qe.us dija, Q'esser puesca contra.l vostr'onramen. Gardaz s'ie.us am de fin cor leialmen Per merce.us prec, bell'amija, Qez ab una qualqe brija Del joi d'amor mi secoraz breumen, Si far se pot salvan vostr'onramen! Q'estiers non posc aver nul jauzimen, Si pietatz e merces no.us inpren |