Main PageTroubadours' ListingMore Works by Uc de St. Circ

The prosody guide is available as a book. Click here for details.

Longamen ai atenduda
Una razon avinen
Don fezes chansson plazen,
Mas ancar no m'es venguda!
E si vuoill de la razo
Qu'ieu ai far vera chanso,
Ela sera mieig partida:
Chansos joiosa e marrida,
Lausan del ben q'ai agut
E plangen car l'ai perdut.

Cui Dieus vol ben si l'aiuda,
C'a mi volc ben longamen,
Qe-m det un ric joi gauzen
De vos, c'ara ai perduda.
Ai Dieus, tant plazens mi fo
Lo jois e tant mi saup bo,
E tant aic avinen vida
Mas aora m'es faillida,
Q'ieu me sent d'aut bas cazut
E-l cor de tot ric joi nut.

De l'onor q'ai receubuda
Del vostre cors covinen
Ai mon cor trist e dolen,
Car vei qe-l volers vos muda
C'aviatz en la sazo
Qan Dieus volia mon pro.
Ai tant mi dol la partida
E si l'amors es fenida
Mal ai vostre cors vegut
E-l ben qe-i es conogut.

Fols cors si penssa e cuda
Que leu pretz so que-l dissen
E per fol neci parven
Ai vista tal decazuda
Q'estava en ric resso
De valor et de faisso!
Car cella cui foldatz guida
Cuida esser enriquida
Qand ve que siei faich menut
Intron en crim e en brut.

E pois dompna es dissenduda
Per blasme de faillimen,
No i a mais revenimen,
C'onors de loing la saluda!
Car de justa faillizo
Troba greu dompna perdo,
Anz li cor chascus e-il crida,
Et anz que torn en oblida
Lo crims a tant corregut
Qu'il es tornada en refut.

Dompna, si-us etz irascuda
Vas mi, ges no-us mi deffen,
Ni-us mi tuoill ni-us vau fugen!
C'anc pois vos aic conoguda,
Non agui entenssio
C'ab autra si ab vos no
Trobes capteing ni garida!
Car vos m'etz tant abellida
Qe non vuoill ses vos m'ajut
Dieus ni-m don joi ni salut.

Lai on non es conoguda
Dreitura, fai falhizo
Qui va-i demandar razo,
E lai on blasm'om faillida
Degr'esser onors grazida!
Mas eu ai tart conogut
So qe-m notz ni m'a nogut.