Main PageTroubadours' ListingMore Works by Uc de St. Circ

The prosody guide is available as a book. Click here for details.

Anc mais non vi temps ni sazo
Ni nuoich ni jorn ni an ni mes
Que tant cum er fai mi plagues,
Ni on tant fezes de mon pro!
Car sui estortz a mal' amor
On Merces valer no-m podia,
E sui tornatz lai on devia,
On trob franqesa et honor
E leial cor d'una color.

E pois mi donz m'a faich perdo
Ni mi a pladeiat Merces,
Si jamais fatz ren q'a lieis pes,
Ja puois Merces no mi razo!
E s'ieu anc jorn amei aillor,
No m'es greu, ni a lieis non sia,
Qer l'am mil tans qu'ieu non solia,
Que lai apresi qual follor
Fai qui-s part de son bon seignor.

Ben sai que ges dignes non so
S'ieu mil tans de mal n'agues pres
Que non ai et totz temps agues
Faich a mi donz qe-il saubes bo,
Q'ela-m perdones sa clamor!
Mas hom forfaitz, qan s'omelia,
Deu trobar merce, si-s chastia,
Que li peneden pechador
An sus el cel lo joi maior.

Ges no-il puosc rendre guizerdo
Dels jois ni dels gaugz ni dels bes
Que mi donz m'a faitz e promes,
Mais d'aitan, de sai on eu so,
Soplei, lai on es, et ador,
E puois recort mil vetz lo dia
Sos digz, sos faitz, sa cortesia
E-ls huoills clars qu'a plens de doussor,
Qe-m tiron doussamen vas lor.

E si tot l'altra falsa fo
Ni failli vas mi ni mespres,
D'aqesta non cre q'o fezes!
Mas car sai c'om tant la somo
D'amar, eu m'en don gran temor
C'am aillors e-n ai jelosia!
Car cel qui ten en sa baillia
Castel a maing demandador
Del perdre deu aver paor.

Chanssos, enans que ans aillor,
A N'Azalais d'Autier ten via,
Q'ieu voill que sapcha de cal guia
M'estai ni cum me vai d'amor,
Ni cum eu sui partitz d'error.