Main PageTroubadours' ListingMore Works by Uc de St. Circ

The prosody guide is available as a book. Click here for details.

Enaissi cum son plus car
Qe non solon miei cossir
E plus onrat miei desir,
Dei plus plazen chansson far!
E s'ieu tant plazen chansso
Fatz cum ai plazen razo,
Ben er ma chanssos plazens
Et gaia et avinens!
Qe-il dig e-il faich e-il ris e-il bel semblan
Son avinen de vos per cui eu chan.

Per qe-m dei ben esforssar
Ab lauzar et ab bendir
De vostre ric pretz grazir,
E dei Amor merceiar
Car de me vos a fait do!
Car be-m rent ric guizerdo
Dels greus durs maltraitz cozens,
E-ls doutz plazens pessamens
Q'ieu ai de vos, cui am e voill e blan
E fuich e sec e desir e soan.

Sens vos me fai soanar
Que no m'en mostra jauzir!
Azautz m'en fai abellir,
Dompna, e-us mi fai desirar!
E sec vos car m'es tan bo
Qan remir vostra faisso!
E-us fuig pel brui de las gens,
E-us blan car etz tant valens,
E-us voill cum etz per servir derenan,
E-us am car vei c'a mon cor plazetz tan.

S'ieu volia ben lauzar
Vostra valor ses mentir
E l'honrar et l'acuillir
E-l vostre avinen parlar
E las beutatz qu'en vos so
E-ill beill si e-il plazen no
E-ls rics gais captenemens,
Ben sabria-l meins sabens
Cals etz! per q'ieu non vos voill lauzar tan
Cum mostra vers ni cum ai en talan.

Ges no m'ausi conssirar
Que vos prec, ni vos aus dir
Cum m'en faitz languen morir,
Ni no-m voill desesperar,
Q'en la vostr' entenssio
Sui rics, pois ai sospeisso
C'Amors qe-lz rics autz cors vens
Mi puosca aitant leumens
De vos donar so que eu vos deman
Cum mi per vos far morir desiran.

Bella dompna, ges no-m par
C'om deia mais obezir
Autra dompna, ni servir
En dreich d'amor ni honrar!
Et a ben plazen sazo
Cel qu' es en vostra preiso,
Qe-l vostr' omils francs parvens
Fai dels cors mortz vius gauzens
E-il mal que datz son ben e pro li dan
E l'ira jois e repaus li affan.

Na Salvatga, mout es gens
Vostre bel comenssamens,
Qe-il dig son gai e li faich benestan
E-l cors plazens e d'avinen semblan.