home page ?


Na Maria de Mons es plasentera,
Francha et humil e d'avinen senblansa,
E fa honor et acuoill volontera
Los bos e lor mostra bell' acoindansa,
E sos cors es joves e bels e bos,
E-ill dich e-ill faich e-ill senblan amoros:
Per que li voill de ben dir far honransa.

E pois Dieus l'a mes en aital carera
Q'en sa valor avem tuich esperansa,
Prec la qe port tan dreita sa seingnera
Q'a sos amics non don dol ni pezansa!
Que pos vira ni chai nuill gonfanos,
No tem hom pois lui ni sos conpaingnos,
E'ill enemic donon se-n alegransa

Na Maria, vejatz ab quals rasos
Ni ab qual sen se fai amar als bos
Na Donela ni-s fai creisser s'onranza.